ليش نقلد المراجع ؟ حوار لطيف بلغة بسيطة وسلسة

#ليش_نقلد_المراجع؟
#حوار_لطيف_ونافع
#سؤال يجي ببال هواي ناس ومن حقهم يعرفون الإجابة وبصورة مبسطة بدون كلمات فصيحة ولا حجي صعب بس لازم تقرون المنشور للنهاية حتى نرسم عدكم صورة عن القضية.
⁉️السؤال هو: ليش نقلد المراجع؟ ليش ما نقلد أهل البيت عليهم السلام كبل ونرجع إلهم بدون ما نرجع للمراجع؟
●الجواب: التقليد مو واجب!
⁉️○هاي شنو، لعد شلون المراجع يكولون التقليد واجب؟

●إي؛ يكولون واجب لأن أنت ما تكدر تعرف الأحكام الشرعية بدون تقليد ورجوع للمراجع، لأن الأصل الواجب عليك هو أنت لازم تبحث بالروايات اللي عن أهل البيت عليهم السلام وتطلع منها الحكم الشرعي بدون ما تقلد.
⁉️○إي لعد ليش ما نكدر؟ خو الروايات متوفرة بالكتب وحتى بالموبايل نقراهة ونطلع الحكم الشرعي بدون ما نقلد!
●أني أكلكم ليش متكدرون تطلعون الحكم الشرعي وحدكم، لأن أول شي هي مو رواية وروايتين علمود تقروهن! هن على أقل تقدير ٥٠ ألف رواية لا، لا أكثر بهواي من هذا العدد!
⁉️○إي؛ نقراهن كلهن ونطلع الحكم الشرعي حتى لو نتأخر سنة سنتين بقرايتهن!
●صحيح تكدر تقراهن، #لكن قرايتهن وحدهة ما تخليك تطلع الحكم الشرعي! تعرف ليش؟
#لأن أكو روايات صحيحة وأكو أحاديث محرفة وموضوعة خلوهة الأعداء وأكو روايات الناقلين مالتهة مشتبهين لأن هو يسمع الكلام من الإمام وينقله فمن ينقل ينقص ويزود بالكلام.
لذلك أكو علوم خاصة تحتاج إلى سنوات تدرسهة علمود تعرف الرواية الصحيحة من الموضوعة والمحرفة.
⁉️○إي، ندرس هذا العلم حتى لو ياخذ ٥ سنوات ونعرف الروايات الصحيحة من المحرفة.
●صحيح تكدر تدرس هذا العلم، #لكن هذا وحده ما يكفي حتى تعرف الحكم الشرعي، لأن أكو روايات صحيحة لكن منسوخة يعني الحكم كان واجب بعدين تغيير، وأكو روايات مورد تقية، يعني الإمام إنطة حكم يختلف عن الحكم الحقيقي لأن كان أكو أعداء يسمعون مثلاً، #فميصير نعمل بهذا الحكم لأنه خاص بس بزمن التقية وأماكن مخصصة، وأنواع هواي من الروايات الصحيحة لكن ما نكدر نعمل بيهة إلا بعد أن ندرس تاريخ الرواية ومكانها وبقية الروايات حتى نعرف الحكم.
●مو بس هيج! أكو روايات ما تكدر تفهمهة لأن لغتهة صعبة وفصيحة وبليغة، ليش آني ما كتبت بالفصحى؟ لأن هواي منكم ما يفهمون الكلمات الفصيحة، لعد شلون يفهمون الروايات اللي بقمة الفصاحة والبلاغة؟
لازم يدرسون نحو وصرف وبلاغة حتى يفهموهة!
⁉️○إي، ناخذ هم ٥ سنوات اخرى ندرس النحو والصرف والبلاغة وراح نفهم الروايات!
●صحيح تكدر تدرس هاي العلوم ومو صعبة، بس حتى لو درستهة ما تكدر تطلع الحكم الشرعي من الروايات! تعرف ليش؟
لأن أكو علم إسمه علم الأصول هذا العقل البشري للإنسان العاقل يقول به وينطي قواعد للروايات حتى منهة تطلع الحكم الشرعي وتؤسس قواعد لفهمها، مثلاً بهذا العلم أكو شي إسمه مفهوم وشي إسمه منطوق
المنطوق يعني نفس كلام الإمام والمفهوم يعني اللي نفهمه من كلام الإمام، أضربكم مثال بسيط؛ نفرض الإمام قال: (يجوز أكل الدجاج إذا ذبحه على الطريقة الشرعية)
هاي الجملة اللي بين قوسين إسمهة منطوق
وفهمنة من الرواية إنو الدجاج إذا ما تذبحه على الطريقة الشرعية فحرام أكله!
⁉️زين الإمام وين كال هيج؟
الإمام ما كال؛ لكن هذا اللي فهمناه من الرواية لذلك إسمه مفهوم.
وأكو هواي أمور بهذا العلم ونقلتكم أبسط شي بيه لأن البقية صعبات عليكم...
ومرات الإمام يكول شي ومرة ثانية يكول شي يختلف عنه بنفس المسألة!
مو بس هيج! مرات الإمام يكول شي بصيغة فعل الأمر يعني واجب بس هو مو واجب!
#مثلاً إذا الطبيب 👨‍⚕️ كال للمريض: لا تأكل الرمان لأنك مريض.
وبعد ما طاب المريض راح لنفس الدكتور فقال له الطبيب: أكل رمان.
#هل هذا يعني لازم المريض يروح ياكل رمان ؟ أكيد لا. الطبيب يقصد هسة تكدر تاكل رمان لأنك تشافيت من مرضك، رغم أنو كال فعل أمر(أكل الرمان) بس ما يقصد الوجوب...
📍الأمثلة هواي بالشرع، مرات الإمام يكول شي بفعل أمر بس يقصد الإباحة والتخيير ومرات يكول شي بصيغة النهي بس يقصد الكراهة!
⁉️○شنو يعني؟ دوختني!
●لا، لا تدوخ، بباسطة: الأحكام الشرعية (5) #وهي: الوجوب والإستحباب والحرمة والكراهة والإباحة.
●مرات الإمام يكول شي بصيغة الوجوب ويقصد الإستحباب ومرات يكول شي بصيغة النهي والحرمة ويقصد الكراهة وهيج شي... وهاي ما تكدر تفهمهة حضرتك إلا بعد أن تخوض في المصطلحات وفي عمق الروايات حتى تعرف الإمام شيقصد...
●مو بس هيج، أكو أمور ما مذكورة بالروايات شلون راح تعرف حلال لو حرام؟
⁉️مثلاً الجكاير أكو بالروايات؟
⁉️مثلاً إستخدام الموبايل أكو بالروايات؟
⁉️ركوب الطائرة والصلاة فيها أكو بالروايات؟؟؟
⁉️إذا صعدنة للقمر يصير نتيمم بتراب القمر ونصلي بأي إتجاه؟ لأن التطور والعلم كل يوم يطلع أمور جديدة لازم نعرف حكمهة بالشرع
هواي ومو بس هواي، لا، أكثر الشغلات ما موجودة بالروايات لذلك شلون تعرف حكمهة؟
💡المرجع من خلال علم الأصول مثلاً يطلع قواعد أساسية من الروايات ومن القرآن يدخل بيهة هاي الشغلات وينطيك حكمهة حلال لو حرام.

0 التعليقات

إرسال تعليق